राष्ट्रिय स्वतन्त्र पार्टी (रास्वपा) का नवनिर्वाचित सांसद सुधन गुरुङले ‘जेनजी विध्वंश’ भएको भदौ २४ गते काठमाडौँका तत्कालीन प्रहरी प्रमुख विश्व अधिकारीसँग बारम्बार टेलिफोन सम्पर्क गरेको तथ्य बाहिर आएको छ।
जेनजी घटनाको छानबिनका लागि गठन गरिएको गौरीबहादुर कार्की नेतृत्वको आयोगको प्रतिवेदनअनुसार, दुईबीच पटक–पटक फोन संवाद भएको सिडिआर (Call Detail Record) मा देखिएको छ। आयोगले विश्लेषण गरेको विवरणअनुसार एसएसपी अधिकारीको नम्बर ९८५१२८०३५५ र सुधनको ९८०१०६६१११ बीच उक्त दिन दुई पटक सम्पर्क भएको उल्लेख छ।
३८ वर्षीय सुधन २३ गतेको प्रदर्शनका आयोजक भने होइनन्। ‘हामी नेपाल’ नामक एनजिओका संस्थापक अध्यक्ष रहेका उनी सो दिन प्रदर्शनकारीलाई पानी वितरण गर्न माइतीघर पुगेका थिए। तर, भ्रष्टाचारविरोधी आन्दोलन उग्र बन्दै सत्तापलटको स्तरसम्म पुगेपछि उनले आफूलाई जेनजी अभियानको अगुवाका रूपमा प्रस्तुत गरे पनि २४ गतेको विध्वंशको जिम्मेवारी भने औपचारिक रूपमा स्वीकार गरेका छैनन्।
आफूलाई आन्दोलनको मुख्य नेतृत्वकर्ता दाबी गर्ने तर क्षतिको जिम्मेवारी लिन नचाहने अवस्थामा उनले प्रहरी प्रमुखसँग किन पटक–पटक सम्पर्क गरे र उनको बढुवाका विषयमा गृहमन्त्री ओमप्रकाश अर्यालसँग किन विवाद भयो भन्ने विषयमा आयोगको प्रतिवेदन मौन रहेको छ।
डिस्कर्डमा भएका छलफलहरूमा ‘हामी नेपाल’सँग सम्बन्धित ‘युथ एगेन्स्ट करप्सन’ र ‘युवा हब’ नामक दुई सर्भर अत्यधिक सक्रिय देखिएका थिए। ती प्लेटफर्महरूमा नेताहरूका घर, पार्टी कार्यालय, सरकारी निकाय तथा निजी प्रतिष्ठानमाथि आक्रमण गर्ने योजनाहरू बनाइएको उल्लेख छ।
सुरक्षा स्रोतका अनुसार, आन्दोलनकारीलाई उकास्दै प्रहरीलाई अलमल्याउने उद्देश्यले ‘किलो वन’ मा फोन गरिएको हुन सक्ने विश्लेषण गरिएको छ।
