काठमाडौं — बालेन्द्र शाह नेतृत्वको सरकारले राहदानी, नागरिकता र सवारी चालक अनुमति पत्र जस्ता अत्यावश्यक सरकारी कागजात अब घरमै पुर्याउने तयारी गरेको छ।
सरकारले ‘सरकारी कुरियर सेवा’ १०० दिनभित्र सुरु गर्ने लक्ष्य राखेको जनाएको छ। यस सेवा लागू भएपछि सेवाग्राहीले सम्बन्धित कार्यालय धाउनुपर्ने झन्झटबाट मुक्ति पाउने अपेक्षा गरिएको छ।
प्रस्तावअनुसार कागजात तयार भएपछि हुलाकमार्फत सिधै सेवाग्राहीको घरमा पठाइनेछ। यसले लामो लाइन बस्नुपर्ने, समय खर्च गर्नुपर्ने तथा बिचौलियाको फन्दामा पर्नुपर्ने समस्या अन्त्य गर्ने विश्वास गरिएको छ।
सरकारी सेवा प्रवाहलाई सहज, छरितो र पारदर्शी बनाउने उद्देश्यसहित ल्याउन लागिएको यो योजनाले सेवाग्राहीको समय र खर्च दुबै बचत गर्ने अपेक्षा गरिएको छ।
यद्यपि, सेवाको कार्यान्वयन प्रक्रिया, शुल्क र सुरक्षासम्बन्धी व्यवस्थाबारे विस्तृत विवरण भने आउन बाँकी रहेको छ।
