काठमाडौं — नेकपा सम्बद्ध जेन–जी रेड फोर्सकी संयोजक स्मृति तिमल्सिनालाई प्रहरीले नियन्त्रणमा लिएर चेतावनीसहित रिहा गरेको घटनाले अभिव्यक्ति स्वतन्त्रता र नागरिक अधिकारबारे गम्भीर प्रश्न उठाएको छ।
बिहान करिब ११ बजे अनामनगरबाट सादा पोसाकमा खटिएका प्रहरीले ‘पार्टीका मान्छे हौँ, काम छ’ भन्दै तिमल्सिनालाई नियन्त्रणमा लिएका थिए। त्यसपछि उनलाई भद्रकालीस्थित प्रहरी परिसरमा लगिएको थियो।
तिमल्सिनाका अनुसार सरकारको आलोचना गरेको कारण आफूलाई पक्राउ गरिएको हो। उनले प्रहरी कार्यालयमा लिखित कागज गराउँदै अब उप्रान्त सरकारविरुद्ध कुनै पनि भिडियो सामग्री नबनाउन दबाब दिइएको बताएकी छन्। ‘भिडियो बनाउँदा गृह मन्त्रालयको अनुमति लिनुपर्ने भनियो,’ उनले भनिन्, ‘लिखित कागज गराएर भर्खर छाडिएको हो।’
तिमल्सिना तत्कालीन माओवादी निकट कार्यकर्ता हुन्। उनलाई गत २९ असोजमा जेन–जी रेड फोर्सको संयोजक बनाइएको थियो। उक्त संगठनले देशभर जनचेतनामूलक कार्यक्रम गर्दै आफ्नो सञ्जाल विस्तार गर्दै आएको छ।
यस घटनाले राज्य संयन्त्रले नागरिकको अभिव्यक्ति स्वतन्त्रतामाथि हस्तक्षेप गरेको हो कि भन्ने बहसलाई तीव्र बनाएको छ। कानुनविद् तथा मानवअधिकारकर्मीहरूले यस घटनालाई गम्भीर रूपमा लिनुपर्ने र स्पष्ट कानुनी आधारबिना यस्ता कदम नउठाउन सरकारलाई सचेत गराउनुपर्ने बताएका छन्।
