नेपाल प्रहरीका महानिरीक्षक (आईजीपी) दानबहादुर कार्कीले पुराना आपराधिक घटनामा संलग्न व्यक्तिले कानुनी उन्मुक्ति नपाउने बताएका छन्।
प्रहरी संगठनले विगतका आपराधिक घटनासम्बन्धी विवरण अभिलेखमा सुरक्षित राख्ने भएकाले दशकौँ पुराना घटनासमेत पुनः अनुसन्धान गर्न सकिने उनको भनाइ छ। पुराना घटनामा संलग्न दोषीलाई प्रमाणका आधारमा कानुनी कारबाहीको दायरामा ल्याउन सकिने उनले स्पष्ट पारे।
आईजीपी कार्कीका अनुसार चर्चित तथा जघन्य आपराधिक घटनाको अनुसन्धानका लागि विशेष टोली परिचालन गरिएको छ। आपराधिक गतिविधिको स्वरूप र प्रविधिमा आएको परिवर्तनलाई ध्यानमा राख्दै प्रहरी सेवालाई थप प्रविधिमैत्री बनाउने काम भइरहेको उनले बताए।
उनले साइबर तथा आर्थिक अपराध अनुसन्धानलाई प्रभावकारी बनाउन आवश्यक जनशक्ति थप गर्ने तथा अन्तर्राष्ट्रिय प्रहरी संगठनलगायत सम्बन्धित निकायसँग समन्वय बढाउने काम भइरहेको जानकारी दिए।
प्रविधिको विकाससँगै अपराधको स्वरूप पनि परिवर्तन भइरहेकाले अनुसन्धान प्रणालीलाई आधुनिक र प्रभावकारी बनाउन प्रहरी संगठन केन्द्रित रहेको उनको भनाइ छ।
