६ भाद्र, पोखरा । मुस्ताङ भ्रमणका क्रममा प्रधानमन्त्री बालेन्द्र शाह जोमसोम बजारस्थित करिब पाँच दशक पुरानो होटल ओम्समा बस्ने बताइएको छ।
ऐतिहासिक महत्व बोकेको उक्त होटल बलिउड अभिनेता अमिताभ बच्चनसँग पनि जोडिएको छ। चर्चित हिन्दी चलचित्र ‘खुदा गवाह’ को छायांकनका क्रममा अमिताभ बच्चनसहित चलचित्र टोली मुस्ताङ पुगेका बेला होटल ओम्समा बसेको बताइन्छ।
मुस्ताङको प्राकृतिक सौन्दर्य र विशिष्ट भूगोलका कारण ‘खुदा गवाह’ चलचित्रका केही दृश्य जोमसोम, कागबेनीलगायत क्षेत्रमा छायांकन गरिएको थियो। चलचित्र छायांकनका क्रममा अमिताभ बच्चन मुस्ताङमा बसेपछि होटल ओम्सले समेत विशेष चर्चा पाएको थियो।
करिब पाँच दशकदेखि सञ्चालनमा रहेको होटलमा अहिले प्रधानमन्त्री शाह बस्ने भएपछि होटल ओम्सको पुरानो इतिहाससँग नयाँ राजनीतिक प्रसंगसमेत जोडिने भएको छ। प्रधानमन्त्रीको मुस्ताङ भ्रमणलाई स्थानीयवासीले समेत चासोका साथ हेरेका छन्।
