काठमाडौं । बलिउड अभिनेता रणवीर सिंह अभिनीत फिल्म ‘धुरन्धर २’ ले प्रदर्शनको पहिलो दिनमै ऐतिहासिक कमाइ गर्दै नयाँ रेकर्ड कायम गरेको छ।
फिल्मले रिलिजको पहिलो दिनमै १०० करोड भारतीय रुपैयाँभन्दा बढी कमाइ गर्दै बलिउड इतिहासकै सबैभन्दा ठूलो ओपनिङ कलेक्सन गर्ने फिल्म बन्न सफल भएको हो। पेड प्रिभ्यूबाट मात्रै करिब ४३ करोड रुपैयाँ संकलन गरेको फिल्मले पहिलो दिन भारतमै करिब १०२ करोड रुपैयाँ कमाएको बताइएको छ। यससँगै प्रिभ्यू र पहिलो दिनको कुल कमाइ १४५ करोड रुपैयाँ पुगेको छ।
यसअघि उच्च ओपनिङ गर्ने फिल्महरू ‘जवान’, ‘पठान’, ‘एनिमल’ र ‘स्त्री २’ लाई समेत ‘धुरन्धर २’ ले पछि पार्दै नयाँ इतिहास रचेको हो।
फिल्मलाई निर्देशक आदित्य धरले निर्देशन गरेका हुन् भने यसमा आर माधवन, अर्जुन रामपाल र संजय दत्त लगायत कलाकारहरूको अभिनय रहेको छ। नेपालमा समेत फिल्म प्रदर्शन भइरहेको बताइएको छ।
विश्लेषकहरूका अनुसार उच्च एड्भान्स बुकिङ, दर्शकको अत्यधिक उत्साह र व्यापक स्क्रिनिङका कारण फिल्मले यस्तो उल्लेखनीय सफलता हासिल गरेको हो। ‘धुरन्धर २’ को यो सफलताले आगामी दिनमा बलिउड फिल्म उद्योगमा नयाँ मापदण्ड स्थापित गर्ने अपेक्षा गरिएको छ।
