काठमाडौँ — गोकुल बाँस्कोटाले विचार, संगठन र व्यवहार नसुध्रिए आगामी चुनावसम्म नेकपा एमाले कमजोर बन्ने चेतावनी दिएका छन्।
बिहीबार बिहान सामाजिक सञ्जालमार्फत धारणा सार्वजनिक गर्दै बाँस्कोटाले पार्टी अहिले नै समाप्त नभए पनि समयमै सुधार नगरे अर्को चुनावसम्म समाप्त हुन सक्ने संकेत गरेका हुन्।
उनले लेखेका छन्, “सक्किएको त छैन, नसच्याए अर्कोपल्ट सकिन्छ।”
बाँस्कोटाले पाँच वर्षअघि नै आफूले तत्कालीन नेपाल कम्युनिष्ट पार्टी (नेकपा)को ‘क्लाइमेक्स र कोल्याप्स’को समय आएको बताएका स्मरण पनि गरेका छन्। उनका अनुसार वामपन्थी दलहरू एकीकृत हुँदा जनतामा अभूतपूर्व उत्साह देखिएको थियो, तर विचार, संगठन र व्यवहार दुई नेताको अधीनमा रहेकाले एकताको आधार कमजोर बनेको थियो।
उनले सोभियत संघबाट पाठ नसिकिएको र चिनियाँ मोडेलको नक्कल गर्न खोज्दा पनि असफल भएको टिप्पणी गरेका छन्।
एक समय केपी शर्मा ओलीका विश्वासपात्र मानिने बाँस्कोटा पछिल्लो समय भने पार्टी नेतृत्वप्रति आलोचनात्मक बन्दै आएका छन्।
