राष्ट्रिय स्वतन्त्र पार्टी (रास्वपा)की नेतृ एवं चितवन क्षेत्र नम्बर ३ की उम्मेदवार सोविता गौतम आदिवासी जनजाति समुदायप्रति दिएको अभिव्यक्तिका कारण विवादमा तानिएकी छन्।
निर्वाचन प्रचारका क्रममा गौतमले ‘आदिवासी जनजाति पैसामा बिक्ने’ भन्ने आशयको टिप्पणी गरेको भन्दै नेपाल आदिवासी जनजाति महासंघ, जिल्ला परिषद् सचिवालय चितवनले कडा आपत्ति जनाएको छ।
महासंघले जारी गरेको विज्ञप्तिमा भनिएको छ, “उम्मेदवार गौतमले यस क्षेत्रका वीर, इमानदार र सचेत आदिवासी समुदायलाई ‘पैसाले किन्न सकिने’ र ‘बिक्न सक्ने वर्ग’ भनी गरेको टिप्पणीले वर्षौंदेखि आफ्नो पहिचान, स्वाभिमान र अधिकारका लागि संघर्षरत आदिवासी जनजाति समुदायको मानमर्दन मात्र गरेको छैन, हाम्रो राजनीतिक चेतना र विवेकमाथि समेत गम्भीर प्रहार गरेको छ।”
महासंघले उक्त अभिव्यक्तिप्रति सार्वजनिक रूपमा माफी माग्न गौतमलाई आग्रह गरेको छ। माफी नमागे चितवन–३ का सम्पूर्ण संयन्त्र परिचालन गरी उनलाई चुनावमा ‘बहिष्कार’ गर्ने चेतावनीसमेत दिइएको छ।
विज्ञप्तिमा भनिएको छ, “नेपाल आदिवासी जनजाति महासंघ चितवन क्षेत्र नम्बर ३ का सम्पूर्ण संयन्त्रहरू परिचालन गरी उक्त उम्मेदवारविरुद्ध सशक्त आन्दोलनका कार्यक्रमहरू अगाडि बढाइनेछ।”
यस विषयमा सोविता गौतम वा रास्वपाको आधिकारिक धारणा भने सार्वजनिक भएको छैन। विवादित अभिव्यक्तिपछि चितवन–३ को चुनावी माहोल थप तातिने संकेत देखिएको छ।
