काठमाडौं, फागुन — नेपाली कांग्रेसका महामन्त्री तथा प्रतिनिधिसभा सदस्य गगन थापाले चुनावी सभामा सहभागी हुन हेलिकप्टर प्रयोग गरेको विषयमा स्पष्टिकरण दिएका छन्।
उनले निर्वाचन आयोगबाट औपचारिक अनुमति लिएर, पार्टीको निर्वाचन कोषबाट निर्णय गरी भाडा तिरेर कानुनसम्मत ढंगले हेलिकप्टर प्रयोग गरेको बताएका छन्।
थापाले भने, “निर्वाचन आयोगले अनुमति दिएर बकायदा अनुमति लिएर पार्टीको निर्वाचन कोषबाट निर्णय गरेर त्यसको भाडा तिरेर सरकारले दिएको सुविधा, आयोगले दिएको सुविधा प्रयोग गरेर यहाँ आएको छु।”
उनका अनुसार १४ गते देशका विभिन्न स्थानमा एकैदिन चुनावी सभा आयोजना भएकाले छोटो समयमै धेरै स्थानमा पुग्नुपर्ने बाध्यता रहेको छ। “सबै ठाउँमा १४ गते नै सभा छ। कम्तिमा मैले तीन–चार दिनमा २० वटा सभा भ्याउनु पर्नेछ। त्यसैले मसँग उपाय नभएका कारणले कानुनसम्मत हिसाबले यो हेलिकप्टरको प्रयोग गर्दै छु,” उनले स्पष्ट पारे।
हाल निर्वाचन प्रचारप्रसारको क्रममा नेताहरूले हेलिकप्टर प्रयोग गरेको विषयमा विभिन्न टिकाटिप्पणी भइरहेका बेला थापाले आफूले कानुनी प्रक्रिया पूरा गरेर मात्रै सुविधा लिएको दाबी गरेका छन्।
