पोखराबाट काठमाडौंतर्फ जाँदै गरेको ग२ख १४२१ नम्बरको यात्रुवाहक बस धादिङको त्रिशूली नदीमा खस्दा ज्यान गुमाउनेको संख्या १८ पुगेको छ। सोमबार राति करिब १:१५ बजे बेनीघाट रोराङ गाउँपालिकास्थित चरौदीनजिकै चाइनाधाराबाट बस नदीमा खसेको हो। जिल्ला ट्राफिक प्रहरी प्रमुख शिशिर थापाले १८ जनाको मृत्यु भएको पुष्टि गरेका छन्। राजमार्ग उद्धार व्यवस्थापन समितिका अध्यक्ष राजकुमार ठकुरीका अनुसार दुर्घटनामा घाइते भएका २५ जनालाई उपचारका लागि अस्पताल पठाइएको छ। ४५ भन्दा बढी यात्रु रहेको अनुमान गरिएको उक्त बस दुर्घटनाको पूर्ण विवरण आउन बाँकी छ। रातको समय भएकाले सुरक्षाकर्मी र स्थानीयलाई उद्धार कार्यमा कठिनाइ भइरहेको छ।
